Jowai, Oct 19: Mi ge·gipa a·paloniko merong bostasako a·pal nokgipaona chile ra·susaaniko a·jani me·asarangni dakrongbagipa Phet Nangsiang-ko chu·gimik chasong gittamrangna galchipe donaoniko West Jaintia Hills a·jani Dorbar Chnong Maitden, Mongolbar salo tangatpilaha.
Ru·uta chasongrangoni ja·rikbagipa darongbewalo jeon mi a·palni nokgipa a·paloni miko bostao chile a·nokgipani nokrangona ra·bachina gita ua somoirango me·asarangko okamrongachim, jenan ua salrango a·nokgipani nokona sokechenggipa mandena gong 1 boksisko on·ronga, gnigipana paisa 50 ko aro gittammgipana paisa 25 ko boksis on·rongachim.
Ia dakbewalko ja·rikanio songoni km 20 ba 25-rangni gita chel·gipa gipin songrangonikoba bak ra·echina gita mi nokgiprang u·iatrongachim jenan me·asarang bostani merongko chile saksa-sakgipin baksa susarongachim.
Indake ong·engon, chasongni kri gari-gorang jensomoio sokbahaon sabajol songoniko merongrangko sokatbana gita mandena bate gario altubatani gimin bilsi 30-rangna skangan ia dakrongbewalkoba dontongatahachim.
Indake ong·oba, Mongolbar salo Phet Nangsiang dakbewalko tangatpiltaiani somoio Mowkaiaw-ni MLA Pa Nujorki Sungoh-ba dongpae bakko ra·angaha.
Salni bako susaaniko ong·atanio gimik sak 14 mangni gita me·asarang bakko ra·angtokaha jemangan kg 40 mang ong·gipa bostani merongko chileming km 1 ni ramako minit 20-rangna kataming re·aming dake susaangtokaha.
Phet Nangsiang-ko ong·atani bak gita jatni minggipin susaatanirangkoba salni bako ong·atangjolaha aro iano bakko ra·e a·jani MLA Pa Nujorki Sungoh, an·tangni kusi ong·aniko parakange, ma·gitcham-pagitchamrangni dakrongbewalko tangatpiltaiani gimin a·jani Dorbar Chnong Maitdeiñ-ko dingtangmancha mittelpilskae aganangaha.
