Tura, May 24: Adita salrangna skang, Garobadha police station-ni ning•o donggipa Chattibui bazar-o A•chik me•chik saksani a•ako Assam-ni manderang todrae ra•na jotton ka•gipani bidingo inquiry-ko dakenba, nanga gita ja•kurangko de•na West Garo Hills a•jani Deputy Commissioner Jagdish Chelani ku•rachakaniko on•ataha ine AHAM South Western Zone-ni general secretary Wester G Sangma parakataha.
Sangma-ni u•iatani gitade, ia obosta ong•gipani bidingo GHADC-ni dilgiparangna u•iatani ja•manoba maming ja•kurangko de•jahani gimin Budbar salo, AHAM-ni dilgiparang, West Garo Hills a•jani Deputy Commissioner-ko grongeskaaha aro ua nanga gita ja•kurangko de•na ku•rachakaniko on•ataha.
Re•anggipa May-ni 21 tariko, Indong Ch Sangma minggipa me•chik saksani Chattibui Bazar-o donggipa a•ako Assam High Court-o tol•e badi ka•enba, decree order-ko ra•bae, ia a•ako toani ja•man, ia bazar-o donggipa te 71 dokkanrangko pe•e galangaha ine koborko on•ahachim. Iani bidingo AHAM South Western Zone-ni dilgiparang, GHADC-ni dilgiparangna u•iatahaoba maming ja•kurangko de•jahani gimin, AHAM-ni dilgiparang, West Garo Hills a•jani Deputy Commissioner-ko grongeskaaha.
Iakoba poraie nina man·gen: HSSLC Arts aro SSLC-ni result-rangko May 26 tariko parakgen
