Shillong, Oct 13: HNLC bobil dolni gitcham dilgipa Cheristerfield Thangkhiew sagina kakket bichalko on·china dabie dingtang dingtang jingjengatanirangko ong·atani bak gita, ‘Sur ka Bri u Hynniewtrep’, Butbar salo Shillong, Malki kal·chakramo asonge jingjengataniko dakangaha.
Bilsi 56 ong·gipa Thangkhiew-ko batanggimin somoio a·doko changgni dake IED bomko gopretatanio jak donganina re·anggipa August 13 tarik pringwal 3 bajimango East Jaintia Hills aro East Khasi Hills police nangrime uni nokona tanggitik re·ange chadrapaniko dakatenba knaani gita police-rang goe so·otahachim.
Iani bidingo HYC Mawlai Unit-ni padot aro ‘Sur ka Bri U Hynniewtrep’-ni membor ong·enggipa Donboklang Kharlyngdoh-ni aganangani gita, sianggipa Cheristerfield-na kakket bichalko on·china dabianio ‘Sur ka Bri u Hynniewtrep’ da·oba kim·kim ong·kuaienga ine agane, chinga maikoba dakna-ka·na amsokgijakode dabijaenga indiba Bah Che-ko so·otao jak donggipa police officerrangko kam dondipatchinasa dabienga, maina uamang kamtangon dongkuaiode judicial inquiry-ko ong·gijachina dilsretangna man·aigen, ine ua agandapataha.
Adita salrangna skang, NPP office nok a·palo bom donanganio jak donggipa sakbonga manderangko rim·ani bidingo sing·angengon, joltang Umphyrnai-oniko uamangko rim·nade police namen ta·rakbea, indiba chingni Khasi jatrang aroba chingni dilgiparangni kosako kragija kattarangchi chonnike agane rogipa aro sae-manenge roenggipa Vickey Dey-kode bilsisa batpilengahaoba uamang rim·na man·chipkuja ine Kharlyngdoh aganchakangaha.
Unomiting, ‘Sur ka Bri U Hynniewtrep’-ni secretary Marbud Dkhar, police-o chu·onga gita sakkirang donggijade chadamberangko skatang rim·na chinga on·jawa ine aganangenba, batanggimin August 13 tarik pringwalo ong·anga gita ua chadamberangnaba apsandakgipa obostarang ong·na nangode? chinga iako je cholchiba ong·na gita on·jawa. Nokdangni manderang iana jajrengsoenga indiba Sur ka Bri u Hynniewtrep, uamang baksa donga,” ine ua parakataha.
Indake ong·engon, uamangni chairman Silvester Kurbah-ni tanggitik a·gilsakko watangani gimin adita antirangna uamang ia mamlao jrip dongangaha indiba da·ode uamangni jingjengatanirangko dontonggija ka·angtaignok ineba Kharlyngdoh parakatjolaha.
