Tura, March 19: An·chingni ku·sikko an·seng-baljoke aro rongatale rakkina nangani gimin manderangna ma·siate on·chi bilsintin dingtang dingtang programrangko ong·ate manirongbaenggipani bak gita World Oral Health Day program-ko South Garo Hills a·jani Chokpot Community Health Centre (CHC)-o Sukrobar salo ong·atangaha.
Ia program-ko ong·ataniara, on·gimin niamrango pangchake sada, biri aro ta·makku jakkalanirangko komiatna aro bon·atna man·na gita Cigarettes and Other Tobacco Products Act (COTPA) aro Narcotic Drugs and Psychotropic Substances (NDPS) Act-rangni gimin tom·bagiparangna agan-talate on·angan baksa gipin dakna nanggni kamrangkoba chatro-chatrirangna agan-ku·pattie ba skie on·angaha, jedakode chatro-chatrirang an·tangtangni be·en-bimangko mikkangchi an·seng-baljoke rakkina man·gen, ia miksonganio mikkrakatni programko ong·ate skie on·angaha.
Songni-nokni manderangna mikrakataniko on·gipa iandakgipa programko Chokpot CHC-ni Dental Surgeon ong·ataha. Sada-biri aro uandake dingtang dingtang ringa-cha·anirangko jakkalanichi bang·a chatro-chatrirang an·tangtangni be·en-bimangko ong·siaona ra·baronga, uni gimin indakgipa programko ong·atanichi maidakode bang·a chadamberang aro poraienggipa chatro-chatrirang mikkangchi uamang nama bewalrango janggi tangna man·gen iarangni gimin agan-ku·pattie on·angjolaha.
Program-ko ong·atanio Chokpot-ni SDPO-ba dongpae poraienggipa chatro-chatrirangna namgipa agan-ku·pattianirangko on·angpaaha.
