Shillong, Feb 9: Ia jani 27 tariko Meghalaya Legislative Assembly-na pu·onaniko ong·atnakenggipana Congress dol, Meghalaya-ko tang·doatna miksonge “5 Star Meghalaya” ine pangchakaniko donenba uamangni election campaign-ko ka·chakataha jeon, Meghalaya Pradesh Congress Committee-ni skotong dilgipa Pa Vincent Pala baksana Meghalaya AICC-ni general secretary Pa Manish Chatrath, Bristibar salo Shillong-o donggipa Congress office-o press conference-ko ong·atgipao uamangni mingbonga kamrangko chu·sokatna nisanko done ku·rachakanirangko manderangna parakangaha.
“A·dokoni kangalbatsranggipa nokdangni ma·giparangna uamangni dedrangko nirok-simsakanio jakkalna man·na gita jao gong 3000 tangkarangko joljol watanian chingni mingbonga ku·rachakgiparangoni dal·batsranggipa ong·enga, maina ian nokdangko chalaianio me·chikrangko bil gnangatani ong·gen aro ua tangkarangchi bi·sarangni skul fee-rangko gama baksana nokna korosrangko ka·anio dakchakanirangko on·gen ine Pa Vincent Pala, koborni manderangna aganaha.
A·doko kam ka·e cha·ani cholrang chu·ongjaengani a·sel chadamberang, chel·chela biaprangchi jekai Delhi, Mumbai, Kolkata dakgiparangchina re·ange janggi tangna cholrangko am·rikkite cha·na gita nangtokengaha ine janapangenba, a·dokoni nokdangprakoni mande saksana kam ka·e cha·ani chol mingprakko on·aniba chingni gnigipa chu·sokatna ku·rachakani ong·enga ine Pa Pala agandapataha.
Unomiting, press conference-ko ong·atgipao bakko ra·e Meghalaya AICC-ni General Secretary Pa Manish Chatrath-ni koborna agananganio, a·dokoni pilak chadamberangni dingtang dingtang a·barango changa-sapanirangko tang·doatna aro uamangna chol aro ramarangko mesoke on·na gita mamingkoba dakjaha ine NPP aro BJP nangrime rikgipa sorkarini kosako matnange aganangskaaha.
NPP-BJP nangrime a·doko chu·sokgijagipa sorkariko rikanichi niam aro ge·etani obostarang namja baksana kam ka·e cha·na cholrang dongjani a·sel chadamberangni gisepo ong·gijagipa ramaona sokangaha aro pekatgipa samrangko sima-ari jolrango badingsrukani kamrangko ka·ona sokpilaha ine a·dok sorkarini kosako matnange aganangkuenba, Meghalaya a·dokko ua pilak namgijagipa kamrangoniko naljokatna gita Congress dolni kam ka·gnikoba Pa Chatrath parakataha.
Meghalaya a·doko cha·boke cha·anirangko komiatna gita Congress dolba kamko ka·na gita ku·rachakenga aro mamingkoba donmitapani gri ong·atna gita niamko ra·gatnasienga aro uan RTI-ni dal·batgipa niam ong·gen ine aganenba, Congress dolni gital ra·gatnasienggipa niamchi pilak namroro-silroroatani kamrangko ka·a matchotani ja·man pilak sorkarirangkon jadokni gisepon uarango nangchapgipa gimik lekkarangko sorkarini portal-rangona watdoatna nangchongmotgipa dakatanichi tangka cha·anirangkoba komiatna dakchakgen ine Pa Chatrath aganangkuaha.
Bijoliko jakkalenggipa nokantina aro bading-chiwalchakgipa biaprangna bijolirangko nangana bate sireksekatgija jringjring watani gimin Congress dol uamangni bongagipa ku·rachakaniko on·anganio, bijoliko ru·uta somoirangna kimitani a·sel a·doko pilak kajinarangko aro man·anirangko ong·katatna man·ja baksana, poraienggipa bi·sarangni dal·gni-chugnikoba cha·sota gita ong·a ine aganenba, bijoliko chu·onga gita on·na Congress dolni ku·rachakenganichi pilak karkanao a·dokni tang·dogniko namdapatasan ong·aigija, bi·sarangni mikkangchi dal·gni-chugninaba dakchakaniko on·gen ineba Meghalaya MPCC-ni General secretary parakataha.
