Guwahati, March 19: Congress aro AIUDF-ni bakrimaniara Assamese-rangni daka rikanirangna kenchakna nangani ong•enga ine Sukrobar salo Assam a•dokni cabinet minister aro BJP dolni dilgipa Himanta Biswa Sarma parakataha.
“Congress aro All India United Democratic Front (AIUDF)-ni bakrimaniara Assamese-rangna kenna nangani ong•enga. Uamang an•chingni daka rikani aro songsalko pe•na man•jana gita uamangko chena nangenga,” ine Sarma, kobor ra•timgiparangna aganaha.
Assam a•doko BJP dol, sorkariko rikpiltaigen aro skango gitan Assam-o namroro silroroaniko ra•baani aro Assam-ni manderangna cholko on•anian BJP dolni mongsonggipa daito ong•gen ineba Sarma parakataha.
BJP dolni dilgipa Himanta Biswa Sarma, Jalukbari Assembly constituency-oni susataina gita Sukrobar salo, an•tangni nomination-ko file ka•angaha aro ja•mano Guwahati songjinmao donggipa Sonaram field-oni DC office-ona jinma re•jomanikoba ong•atangaha.
Adita salrangna skangsan, Union Home Minister Amit Shah-ba, ia Assam Assembly election-o AIUDF baksa bakrimengani gimin Congress dolko matnangatahachim.
Assam-ni dam 126 Assembly constituency-rangna election-ko re•baenggipa March 27 tarikoni bakgittam dake ong•atengachim ine nikna man•a.
