Shillong, Feb 16: Batanggimin 2021 bilsini November jao, a·dokni skotong minister gitcham Dr Mukul Sangma aro uni nokdangni Congress dolko wate katenba TMC dolo napangani bidingo, TMC-ko nokdang ge·sani dol ba party-sa ine Congress dolni padot Pa Vincent Pala, Bristibar salo aganangaha.
Bang·gija salrangni gisepo a·doko pu·onnasienggipana wenroroe aganprakanganio, Congress dolni bimangan bon·aiaha ine aganangenba, eleksino BJP dol aro uamangoni susaenggiparang baksa bilake susagriknagipade Trinamool Congress-san ong·aignok ine TMC doloni aganangahachim.
Ua kattarangna aganchakangskaengon, Meghalaya Congress-ni padot Pa Vincent Pala, Meghalaya-ni TMC-de nokdang party-sa ong·aia aro nokdang ge·sani manderangnasan ong·a ine Congress-oni ong·kate TMC-o napanggipa Dr Mukul Sangma-ni nokdangko miksonge aganangenba, Congress dolko bon·aignok ine agananganina, Trinamool Congress dolan bak dakgiminsa ong·aha maina TMC-o bakrimgipaoni bang·batan da·alo ong·kattokenba gipin dolrangchisa napetokaha, indake ong·ode, Congress-na bate Trinamool Congress-ni bon·gninasa kenchakani dongbatenga ine matnange aganangskaaha.
Meghalaya-o dal·dala kattarangko agane manderangna bang·e ku·rachakanirangko dakenggipa Trinamool Congress dolchi sorkariko rikanio West Bengal-o mai obostarang ong·enga, a·dokni gadang mai ong·enga aro law and order-ni obosta mai ong·enga uarang pilakkon a·dokni manderang bon·e-chon·en u·itoka ine aganangkua baksana, Congress dolni gimin TMC dal·en ma·sisretengasa, maina da·aloba Congress dol skango gitan apsanaiengkua aro ia pilakkon eleksin matchotani ja·man uamang u·igen ine Pa Pala agandapataha.
