Tripura, August 8: Tripura a•dokni dam 8 a•jarangoni dam 3-o Opposition Congress dolni kanta 24na champenganirangko sombar salo ong•atanio sak 300mang dolna kam ka•giparang rim•a man•aha aro Unakoti, Dhalai aro North Tripura a•jarango adita so•sojengjeng a•selrang ong•angaha. Ia champenganiko ong•atanio songdonggipa manderang chu•gimik bakrimaniko on•jaha.
Congress dol gimik ming 16 dabianirango pangchake shutdown-ko ong•ataha. Dolni dabianirango Agnipath scheme-ko ra•galani, Tripura-ni niam retirangko nipiltaie namdapatani, opposition dolni manderangni kosako chadrape a•sel ong•atgipa manderangko niamo sasti on•ani aro kamgri dongenggipa chadamberangna Mudra loan-ko on•china dabianirang dongchapa.
Police-rangni u•iatani gitade gimik sak 300mang dolna kam ka•gipa manderang baksa local leader-rangko salantio ramram manderangni kam ka•anirangko so•sojengjeng ong•atanina niamo pangchake rim•aha. A•dokni damgittam a•jarangni badiaba biaprango school nokrang, dokkanrang aro anti cha•ram biaprangko kulitokjaha. Unikoa gari-gorarangni re•ruraanirangoba namen komiaha.
Adita biaprango so•sojengjeng ong•anirang nadoanio Unakoti a•jani Kailashahar biapo ma•ningsa sakgniko dokanina sakgni manderangko police rim•aha.
Congress dolni dilgiparang champenganirangko ong•atani chu•sokgipa ong•aha ine agangenchimoba songdonggipa manderangni BJP dolni rikenggipa sorkarina tanggitik bakrimaniko nikangskana man•aha.
