Shillong, Dec 8: Congress doloni ong·kate All India Trinamool Congress (AITC)-o napanggipa sak 12 MLA-rangko disqualify ka·china badi ka·e sedoaniara Congress dolni golpo taridapna jotton ka·anisa ong·enga ine Budbar salo Meghalaya a·dokni gitcham chief minister aro Congress doloni AITC-o napanggipa Mukul Sangma parakataha.
AITC-ni MLA-rangna show cause notice-ko on·ani ja·man, Budbar salo Mukul Sangma baksana gipin MLA-rangba aganchakaniko on·na gita Meghalaya Assembly-ni Speaker-ko grongeaha.
Iani bidingo kobor ra·timgiparangna talataniko on·angengon, kakketko dongnue Trinamool Congress-o napanggipa MLA-rangni kosako golpo taridapna miksongesa ia MLA-rangko disqualify ka·china sedoataha ine Sangma parakataha.
Congress doloni ong·kate AITC-o napanggipa membor-rang bakgittamoni bakgni gapja ine matnanganiara kakket ong·ja maina TMC-o napanggipa MLA-rangko pilakan ma·sitoka aro uamang 10 Schedule-o nanganiko chu·sokataha ineba gitcham chief minister aganaha.
Tura-o hajalni hajal chadamberang INC-oni ong·kate TMC-o napangtokengaha ineba Sangma parakataha.
