Tura, April 19: GHADC eleksino Congres dolo suae seokako man·gipa sak 12 gital MDC-rang, District Congress Committee (DCC)-ni padot aro Congress dolni agantimgipa Pa Zenith Sangma aro dolni gipin dilgiparang, Sombar salo MDC ong·e ku·mikchetangani ja·man Tura Congress Bhawan-o tom·tome chanchirimangaha.
Tom·a matchotani ja·mano kobor ra·timgiparangna aganengon, Garo Hills-ni pilak Congress dolna kam ka·giparang aro vote pu·ongipa sakantikon Congress dolni palo gisik-ka·tong gimikchi mittelna kusi ong·a ine Pa Zenith Sangma aganangaha.
“A·chik a·songni Congress dolna pu·ongiparang aro ia eleksino bakko ra·gipa sakantikon chinga dolni palo mittela. Da·alo ia eleksinni result-ko nikahaon ma·sina man·a, chong·motan jegita bil-jak, tangka-paisani gita pilak sorkarini bilrangko jakkale skotong minister aro NPP dolni dilgiparang ia eleksino chena jotton ka·genchimoba, Congress dol MDC seat-rangko bang·bate cheaha ine aganenba, Congress dol tangka-paisa gri aro tangka-paisako jakkalna man·gija, je bang·pagija tangka-paisarangchi eleksino kam ka·e A·chik a·songni manderang baksa ku·monganiko dakengon, Congress-na bang·bate vote-rangko on·aha ine result-oniko sakkirangko man·aha aro ian Congress baksa bakrime mikkangchi dolko bilakatna aro a·doko Congress sorkariko ra·bataina miksonganiko parapeani ong·a ine DCC-ni padot Pa Zenith Sangma aganaha.
Bang·a manderang Congress dolni dilgiparango ka·dongchake bebera·aniko donaha aro bang·ate vote-rangko on·aha. Da·alo indita tangka-paisa aro sorkarini bilrangko jakkale sasono ong·enggipa dolna pu·onjaode maming saloba namroro-silroroani bak-rengsiko man·pajawa ine manderangko ka·mikkennatachi vote-rangko man·na jotton ka·genchimoba NPP-na bate Congress-na bang·bate vote-rangko on·ani ortoara, A·chik a·songni manderang NPP-o ka·dongchakna man·jae jegalaniko mesokani ong·a ine nikna man·aha ineba Pa Sangma agankuaha.
Ua indakeba aganangkuaha, da·alo ia GHADC-o EC-ko rikna Congress dolo memborrang chu·ongmanjaha, uni gimin je MDC-rang aro party-rangan ching gita apsan gadango ong·pae GHADC-ko NPP-ni chalaianichi ong·siate nosto ka·ahani gimin manderangna agane eleksino susae cheahachim, uamang baksa council-ko rikna agangrikjokchim, indiba NPP bang·a mikbokatanirang aro tangka-paisarangko on·e uamangni chakpaaniko ra·aha ine matnangenba, chinga maming saloba indake ong·gija mikbokatanirang aro tangka-paisarangko on·e MDC-rangni chakpaaniko man·na jotton ka·ja, indiba kakketo A·chik a·songni manderangna dangdike on·na miksongesa ia eleksino susaaha aro uandaken chingo memborrang chu·ongmanjahaoba, MDC-rangko bang·bate man·aha, uni gimin chinga da·alo chanchininge kam ka·na sikgiparangko mikkangchi A·chik a·songni gimin chanchie kam ka·nagipa MDC sakantiko rimchaksoa ine Pa Sangma parakataha.
Indake ong·engon, GHADC-o gital EC-ko rikna chingo memborrang chu·ongmanjaoba, jakkaltogipa warachakgipa dol ong·e A·chik a·songni namgnina kamko ka·angskana kang·kare kae re·chakatenga” ine Pa Sangma agandapaha.
