Shillong, Jan 18: Mongolbar salo, National People’s Party (NPP)-ni election-ko Shillong songjinmao donggipa NPP-ni office-o ong•atangaha aro election-ko ong•atanio Meghalaya a•dokni Chief Minister Conrad K Sangma-ko NPP-ni national president songpiltaiaha.

Election-ko NPP-ni national president, national general secretary aro national party treasurer-ko seokna gita ong•atahachim.

Election matchotani ja•mano kobor ra•timgiparangna u•iatengon, Conrad K Sangma-ko national president-na seokpiltaiaha aro Thomas A Sangma-ko national general secretary-na seokskaaha ine NPP-ni national spokesperson aro election-ni returning officer Abhaya Kashyap parakataha.

National party treasurer-ni kamna susagipa dongjahani gimin treasurer-ni kamko bangbang donangchengaiaha ineba Kashyap parakataha.