25.3 C
Tura

Corona sabisini gimin ma·sisretatanirang social media-o giproroenga

Must read

Shillong, May 3: India gimiko COVID-19 sajinmani mamlarang salsa-batbat tang·dorikrikengani gisepon, gnigipa gadango bilakbate sokbataigipa sajinmako champengna aro sabisina sana-banani cholrangko on·ani bimingo ong·gijagipa kattarangko gipatna, manderangna tol·e u·iatanirangko on·na gita sam jakkalgipa oja dakgiparangna namgipa cholko on·a gita ong·skaenga.

Ia Covid-19 sabisiko champengani aro namatani bidingo manderangni ku·sikoni ong·katgipa kattarangni jangbingbangani aro dingtang dingtang dake bebera·e sana-bananiko on·anirangan da·ororo dingtang dingtang social media platform-rango aro gipin digital media-rango ta·raken giproroenganichi ma·sisretanirangko on·engaha.

Iarangni bidingo aganchakaniko on·engon, NEIGRIMS-ni Director Dr P Bhattacharya, songdongenggipa manderangna kakketgipa kattarangko agan-janapate, saako sangipa doctorrang aro medical expert-rangko gronge sing·cheng-sanchenggija indake sana-banani cholrangko manderangna on·jachina gita didiataha.

Dingtang dingtang rokomni ayurvedic samko ringanichi ba gipin ringanirang jekai chu ba bleaching-ko ringanichi maming dakeba corona sabisiko namatjawa. Unbaksana, Redemsivir-ko su·anichi corona saoniko an·sengatjawa aro sajinmani biljimgipa saani rokomrangkoba namatjawa.

Mikkango mask-rangko ganachi, jakrangko rongtalatachi, jaksujringachi aro saksa-sakgipinoni chel·tanggrike dongachi ia namjabegia sajinmako champengna gita dongimin niamrangko manderang namedake ja·rikna nanggen.

Indake ong·engon, social media platform-rango indakgipa tol·e jangbingbangatgipa kattarango ga·akonjachina gitaba ua, manderangko didiangjolaha.

More articles

-->
-->

Latest article