Shillong, June 12: COVID-19-ko sanna bananio aro warachakanio jakkalenggipa ma·manti bosturangna GST-ko 5%-ni ning·o donatna gita Sonibar salo, GST Council-ni chang 44-gipa tom·anio tik ka·e donangaha.
GST Council-ni tom·aniko Union Finance Minister Nirmala Sitharaman-ni dilanichi internet gita ong·atangaha aro ia tom·anio Finance & Corporate Affairs-ni Union Minister of State Anurag Thakur, Meghalaya a·dokni Chief Minister Conrad K Sangma aro dingtang dingtang a·dokrangni finance minister-rang aro Finance Ministry-ni dal·dalgipa officer-rangba bakko ra·angaha.
Ia gital GST rate ba damrangko ia 2021 bilsini September 30 tarikona donangna gita ia tom·anio tik ka·angaha.
Skango 5%-ni ning·o ong·gipa Amphotericin B aro Tocilizumab samrangna da·o GST-ko chu·gimik watskaaha indiba skango 12% ong·gipa Remdesivir aro Heparin gita dakgipa samrangna da·o GST-ko 5%-ni ning·o donataha. COVID-ko sanna gita Health & Family Welfare aro Dept of Pharma (DoP)-ni recommend ka·gipa gipin samrangna da·o GST-ko 5%-ni ning·o ra·skagnok.
Skango 12% GST-ko ra·gipa medical grade oxygen, oxygen concentrator/generator, ventilator, ventilator mask/canula/helmet, BiPAP Machine, High Flow Nasal Canula (HFNC) ostro, COVID-na porikka ra·ani bosturang aro uandakgipa pilak bosturangnaba da·o GST-ko 5%-ni ning·o donataha.
Skango 18% GST ra·gipa bosturang, jekai hand sanitiser, temperature niani ostro, manggisi so·na jakkalgipa gas/electric aro uandakgipa bosturangnaba da·o GST-ko 5%-ona komiataha.
Skango 28% GST ra·gipa ambulance-rangkode da·o 12% ka·e GST-ko ra·skagnok.
Iandake COVID-ko sannanio aro warachakanio jakkalenggipa ma·manti bosturangni GST-ko komiatchina gita dolsa minister-rangni ku·pattianiko re·anggipa June-ni 7 tarikon Meghalaya a·dokni Chief Minister Conrad K Sangma, New Delhi-o Union Finance Minister Nirmala Sitharam-na on·eahachim.
Meghalaya a·dokni Chief Minister Conrad K Sangma-ko convenor dake songenba, ia Group of Ministers (GoM) ba dolsa minister-rangko re·anggipa May jani 29 tariko India sorkarini Finance Ministry songe on·angskaahachim. Ia dolni gipin membor-rangara, Gujarat-ni Deputy CM Nitinbhai Patel, Maharashtra-ni Deputy CM Ajit Pawar, Goa-ni Transport aro Panchayati Raj Minister Mauvin Godinho, Kerala-ni Finance Minister KN Balagopal, Odisha-ni Finance aro Excise Minister Niranjan Pujari, Telangana-ni Finance Minister T Harish aro Uttar Pradesh-ni Finance Minister Suresh Kr Khanna ong·achim.
Ia minister-rang, re·anggipa June-ni 3 tariko video conference gita tom·aniko ong·atangenba, COVID-ko sannanio aro warachakanio jakkalenggipa dingtang dingtang bostu aro samrangna GST-ko komiatani bidingo chanchirimangaha.
