Shillong, Feb 17: Da•o dipet Meghalaya a•doko COVID-19-na champengatanirangko olgrokdapatkujawa ine Budbar salo, a•dokni Health Minister James Sangma parakataha.
“Covid-19-ko man•giparang komiangengako nikesa chinga champengatanirangko olgrokataha aro da•o dipet je bangki niamrangko olgrokatani giminde chinga chanchia dongkuja,” ine Sangma aganaha.
A•doko Covid-19 man•giparangni gimin talataniko on•angengon, da•ororo Covid man•giparang komiangengahani giminsa sorkari adita niamrangkode olgrokataha ine Health Minister parakataha.
“Obostarang ka•sinsin namroroangenba COVID-19 man•giparang tang•doangtaigija skango gitan obostarang ong•piltaina chinga ka•dongenga,” ine ua aganaha.
COVID-19-ni niamrangko olgrokatanina Opposition dolko dilgipa Dr Mukul Sangma-ni sorkariko matnanganina aganchakaniko on•angengon, doctor-rang aro an•seng baljokaniko on•na rakbee kam ka•enggipa manderangko ua mande ra•na nanga ine James aganaha.
