Shillong, May 18: Corona sabisini batrikrikaniko champengna gnigipa gadango ong·attaigipa lockdown-o niamrangko rakbatatgenchimoba, Shillong songjinmani bajar-antirango manderangni manigija niam pe·anirangko nikangna man·aha aro mitam nangchongmotgipa bostuko palenggipa dokanrangko kulina on·aniko chol ra·eming gipin dokanrangba kulipae bosturangko palangtokaha ine kobor man·soaha.
Indake ong·engon, ia somoirango administrative-ni gadango iandake niam pe·giparangko nirokangskaenba bang·a dokanrangkon chipchange donataha aro dairangkoba gamataha. Unbaksana, bang·a dokanrangni kosako FIR-koba segatangaha.
Chu·gimik chipchangatoba, maming nangchongmota gri skatang roramgiparangkoba police-rang nirikkiataniko bilakdapataha aro Corona-na dongimin niamrangko pe·giparangni kosako da·ode raken ja·kurangko de·atengaha.
Sabisini salsa-batbat batrikrikenganichi, Meghalaya a·dokoniko Mongolbar salo gimik sak 906 mangoniko COVID-19 sajinmako rim·a man·taie sagiparangko salsaon bang·bate segatangaha, jechin da·o a·doko sae dongenggiparangara gimik sak 5,332 mangona doaha ine Health department-oni u·iataha.
Knasoani gita, batanggimin konta 24-ni somoion a·dokoniko sabisiko man·gipa sak 470 gital manderangko segatangtaiaha, jeon saoni nampilgiparang gimikara sak 19,185 mang gapeaha. Unbaksana, batanggimin konta 24-ni gisepon sak 19 manderangba ia sabisiko man·e siangdapaha jechin da·o a·dok gimiko COVID sae sianggiparang gimik sak 355 mang ong·aha.
