Shillong, April 28: Meghalaya a•doko ta•rakbee COVID-19-ni giproroenganiko champengna gita, May 1 tarikoni May 10 tarikona a•dok sorkari, Shillong, Tura aro Jowai-o niamrangko bilakbatataha.
Budbar salo, a•dokni Chief Minister Conrad K Sangma-ni dilanichi dingtangmancha Cabinet-ni tom•aniko ong•atangenba, May 1 tarik pring 5:00 bajioni May 10 tarik pring 5:00 bajiona, Shillong, Tura aro Jowai-o manderangni re•ruraani aro kam ka•anirangko champengna adita rakgipa niamrangko ra•gatangaha. Ia tom•anio a•dokni Deputy Chief Minister Prestone Tynsong, Health Minister AL Hek aro gipin dal•dalgipa officer-rangba dongpae bak ra•angaha.
Ia tom•anio dingtangmancha dingtang dingtang a•jani deputy commissioner-rang baksaba video conference-ko ong•ate, dingtang dingtang a•jarango ong•enggipa obostarangko niangjolaha aro biap damgittamna niamrangko ra•gatna skang Health department-ni ku•pattianirangkoba ra•angaha.
Batanggimin antignimangonin gipin biaprangoni re•bapilenggipa manderang batroroangahani a•sel, a•doko COVID-19 man•giparang batroroangaha aro uandaken rakgipa niamrangko ra•gatna sorkari draatako man•aha.
Sabisini giproroaniko champengna man•na gita a•jatangtango niamrangko ra•gatchina aro ia niamrangko bilake ra•gatchina gita sorkari, deputy commissioner-rangna bilko on•angaha.
Shillong, Tura aro Jowai-o sal 10-na bang•bata kamrangko aro manderangni re•ruraanirangko champengatengoba, ia changode re•anggipa bilsio ra•gatgipa lockdown gita ong•gija sorkari, nangchongmotgipa dokkanrang, mongsongbate mirong, sam, hardware, electrical aro uandakgipa nangchongmotgipa dokkanrangko kulina on•skaenga.
Nangchongmotgipa dokkanrang, jekai mirong, sam aro uandakgipa dokkanrangko kulina on•engon, manderangko kenjagoke koros ka•jachina gita sorkari didiataha. Ia sal 10-ni gisepo manderangni nangchongmotgipa bosturang bon•changjana gita bostu salruraenggipa garirangkode champengjana gitaba sorkari tik ka•angaha. Apsan daken, sanna bananirangna re•ruraenggipa manderangkoba ia sal 10-na champengatanio maming champengani dongjawa ine u•iataha.
Ia sal 10-ni gisepo da•o ong•atenggipa porikkarangkoba ra•angkuaigen indiba Shillong, Tura aro Jowai-o skul, college, university aro uandakgipa pilak institute-rangkon chipe donanggen.
Nangchongmota kamrangni gimin re•rurana nangenggipa manderangde permission-ko ra•chengna gita nanggen aro uamangna deputy commissioner-rang pass-rangko on•gen ine u•iataha.
Ia sal 10-ni gisepo nangchongmota kamrangna re•ruraenggiparangna agrede a•ja damsaoni a•ja damsaona re•rurana man•jawa.
