Tura, April 29: Tripura a·dokoni saksa koelarangko gipinchina watatronge badinganiko dakenggipa bilsi 36 mang ong·gipa Dhanesh Debbarma, COVID sajinmako man⋅e mijal April 29 tariko janggi galaha.
Koborko man⋅soani gitade, sianggipa mande adita salrangna skangan be·enni an⋅sengijaniko man⋅engachim. Indake, mija Butbar salo ua an⋅tangni an⋅sengjanina Chaipani songni ge·sa sam palgipao IV-ko on·ani somoio nom·bokanina uko West Garo Hills-ni Dalu CHC-ona rimange ta·raken sana-bananiko on·na jotton ka⋅ahachim, indiba uko sanna skangan janggi galaha ine koborna u·iataha.
Indake ong·engon, ua mandeko COVID sajinmana porika ka·o positive man·aha aro unbaksa dongpagipa aro uko salbagipa sakgittam manderangoni sakgnikoba COVID sabisiko rim·a man·aha ine koborko man⋅sodapaha.
