Shillong, June 7: Shillong songjinmani dingtang dingtang hospital-rango COVID-19-ko warachakna kamko ka·anio on·gilpaani gita Sombar salo Khasi Students Union (KSU)-ni membor-rang, PPE aro COVID-ni dingtang dingtang bosturangko Bethany Hospital-na on·ataha.
Ia bosturangko Bethany Hospital-na on·atani ja·man, kobor ra·timgiparang baksa agangrikengon, COVID man·gipa manderangna dakchakanirangko on·na gita hospital-rangan mikkango donge kam ka·giparang ong·a aro ia sabisiko sanna bananio doctor aro nurse-rangan mongsonggiparang ong·ani gimin uamangnaba naljokaniko on·skana man·na nanga ine KSU-ni president Lambok S Marngar parakataha.
Shillong songjnmani dingtang dingtang hospital-rangnaba KSU, dingtang dingtang bosturangko suale on·enga ine talatangengon, uamang Jaiaw-o donggipa Dr H Gordon Roberts Hospital aro Laitumkhrah-o donggipa Nazareth Hospital-naba COVID-ko warachakani bosturangko sualataha ine KSU-ni president parakataha.
East Khasi Hills a·jao COVID man·giparang batengani gimin aro dingtang dingtang a·jarangonikoba Shillong-ni hospital-rangonasa watatengani gimin ia hospital-rango kamko ka·enggiparang namen neng·nikanirangko chagrongna nangenga ineba ua aganaha.
Iandakgipa bosturangko on·gilanichi uamang hospital-rango kamko ka·enggipa doctor aro nurse-rangna dakchakaniko on·skana miksongenga ineba KSU-ni president parakataha.
