Shillong, June 7: COVID sabisini gimin manderangna dakchakaniko on·ani bosturango GST-ko ra·ani aro watchangani gimin Group of Ministers (GoM)ni agan-ku·pattianirangko Meghalaya-ni skotong minister Pa Conrad K. Sangma, New Delhi-o Sombar salo Union Finance Minister Ma Nirmala Sitharaman-na on·angaha.
India sorkarini Ministry of Finance, batanggimin May 29 tariko Pa Conrad Sangma-ko Convenor-na seoke gimik sak-chet membor gnanggipa a·dok damsa-damgipinni Group of Minsters (GoM)-ko dilna gita songangaha. Dolo dongpagipa gipin memborrangara — Gujarat-ni dakchakgipa skotong minister Pa Nitinbhai Patel, Maharashtra-ni dakchakgipa skotong minister Pa Ajit Pawar, Goa-ni Transport aro Panchayati Raj-ni minister Pa Mauvin Godinho, Kerala-ni Finance minister Pa K.N. Balagopal, Odisha-ni Finance aro Excise minister Pa Niranjan Pujari, Telengana-ni Finance minister Pa T. Harish Rao, aro Uttar Pradesh-ni Finance Minister Pa Suresh Kr. Khanna-maang ong·a.
GoM-ni mongsonggipa kamara, Covid sagipa manderangko sanani drugs ba samrang, sajinmani tikarang, Covid saako rim·na porikka ka·ani bosturang; medical grade oxygen, pulse oximeter-rang, hand sanitizer-rang, oxygen therapy-ni bosturang jekai concentrator-rang, generator-rang aro ventilator-rang, PPE kit-rang, N95 mask-rang, surgical mask-rang, be·en ding·ako porikka ka·ani ba temperature niani bostu aro Covid sabisio nangchapgipa minggipin dakchakani bosturangna GST ba kajinako ra·ani ba watchangani gimin nirokatchina aro uarangna agan-ku·pattianirangko on·china gita ong·a.
Iani bidingo, GoM, mija June 3 tariko video conference-ko ong·ate jinma agan-golpoe chanchirimaniko dakangaha.
Pa Conrad, uamangni agan-ku·pattianirangko parakgija, manderangna ia sajinmani a·sel dakchakanirangko on·na man·gipa bosturangni damrangko namen komidapatna aro kajinarangko ra·ani gimin GoM man·adipet agan-ku·pattianirangko on·na gita jotton ka·aha ine u·iatangaha.
