Shillong, Feb 9: A•doko covid sajinmani niamrangko nipiltaie namdapatna aro mitam niamrangko ra•galangpilna a•dok sorkari tik ka•angaha. Jemangan ponggni covid bijirangko su•manahachim uamang RT PCR testko ka•na nangjawaha aro a•doko porikka ra•a grian napna man•aignok ine aganaha. Walni curfew-ba dongjawaha, sombar salonide skulrangba chu•gimik kulina man•gnok, Shillong-o online class ra•giparangba da•ode classtangtangon ba skultangtangon skie ra•na man•aignok ine Skotong Minister Conrad Sangma aganangaha.
Mande siao tom•aninaba permissionko ra•na nangjawaha indiba adita covid niamrangko nigrike ja•rikna nangskagen. Bia ka•a aro indakgipa dal•gipa tom•anirangko dakna man•aignok aro saoba iarangna permissionko bi•genchimoba Districtni DC ba SDO rangan nigrike cholko on•a man•aignok. Cinema hall, restaurant-rang ba covid bijiko su•mantokahode kulina man•aignok aro gari gorarangba odd even-o pangchake salrurana man•gen. “Ia pilak niamrangkon re•baenggipa February-ni 11tarik sukrobar saloni ja•rikangskagen ineba aganaha.
Ia niamrangko maina komiatengaha ine sing•on, a•doko covid saanirang komiangahani gimin aro sagiparangba siarangde komiahani gimin ia niamrangko komiatengaha ine skotong minister talataniko on⋅aha.