Tura, Feb 26: Sonibar walo, election-na campaign ka•ani somoi bon•ani ja•manoba, Dalu constituency-ni ning•o donggipa song damsao napna jotton ka•engmiting somoio, Dalu constituency-ni BJP candidate Akki A Sangma-na kam ka•enggipa dolsa manderangko, songni manderang, gong 1,74,360 tangkarang baksa rim•na man•aha.
February 27 tariko ong•atenggipa Meghalaya Legislative Assembly election-na Election Commission-ni campaign ka•na dongimin somoi Sonibar attam 4:00 bajion bon•ahachim indiba Sonibar walona kingkingan BJP-na kam ka•enggipa manderang, Dalu constituency-ni ning•o donggipa song damsaona re•ange, manderangni vote-rangko tangka paisarangchi brena jotton ka•engachim.
Indake ong•genchimoba, ua somoio songni manderang, mikrake kamko ka•soanichi, gari bolgniko champengsona man•aha aro ia gari bolsaode Association for Democracy & Empowerment (ADE) dolni president Dalseng Bira Ch Momin-ba dongachim.
Police-rangni u•iatani gitade, Tura KA Road gittimni Dikan Marak, Dalu police station-ni ning•o donggipa Kujikura songni Jepan Marak aro Dalu police station-ni ning•o donggipa Mangkenggre songni Kambe M Marak minggipa manderangoniko songni manderang, gong 1,74,360 tangkarangko man•aha.
ADE-ni president-onikoba songni manderang, gong 32,000 tangkarangko man•aha aro ja•mano rim•a man•gipa manderang baksana ia tangkarangkoba songni manderang, apsan walon, police-rangna aro Election Commission-ni Static Surveillance Team-na pakwate on•ataha.
Indake ong•engon, an•tangni kosako matnanganirangko ADE-ni president Dalseng Bira Ch Momin jegalatskaenba, ua somoio ong•a obostani gimin talataniko on•ataha.
Momin-ni talataniko on•atani gitade, Sukrobar salo uni nogipa nanggipani bia Joshipara songo dongani gimin ua biaona re•ange Sonibar attamchibara nokona re•bapilengmiting somoio Doriapara songoni uni jonggipa nanggipa unbaksa songona re•bapana am•ahani giminsa ua an•tangni jonggipa nanggipako Doriapara songona salangjolengachim. Songona re•angengmiting somoio uamang song sambao donggipa ramao su•buna skani gimin neng•takon, songni manderang uamangko banoni re•bagipa manderang ine rikbae, uamangko election-na wengiparang ine potchipenba attamni 6:30 bajimango rim•aha.
Uamangko rim•ani ja•man, songni manderang walni 9:00 bajimango dolsa manderangko rim•taiaha aro uamangko apsan dolonin ine potchipenba kragija dake doka sata dakan baksana kragija kattarangchi inaha ine ADE-ni president parakataha.
Uamangko iandake rim•e bichal ka•engmiting somoiosa election observer-rang ua biapona sokbae, uamangko police thana-ona rimangaha aro thana-ona rimange uamangko bichal ka•aha indiba unikode songni manderang an•tangtangan gong 32,000-kosan man•aiahani gimin ja•mano uko police-rang aro election official-rang watpilataiaha ine Momin parakataha.
