Shillong, July 13: Budbar salo, Meghalaya a•dok gimikni deputy commissioner-rang aro sub-divisional officer-rangni tom•aniko Shillong songjinmani State Convention Centre-o ong•atangaha aro ia tom•aniko Meghalaya a•dokni Chief Minister Conrad K Sangma dilangaha. Apsan daken, Police department-ni Superintendent of Police (SP) aro Commandant-rangni tom•anikoba Shillong-ni Police headquarter-o ong•atangaha aro ia tom•anikoba Chief Minister, skotong sokgipa ong•e dilangaha.
Ia tom•anirango a•dokni Chief Secretary RV Suchiang, a•dokni Director General of Police (DGP) Dr Lajja Ram Bishnoi aro gipin official-rangba dongpae bak ra•angaha.
DC aro SDO-rangni tom•anio a•dokni Chief Minister aganprakengon, batanggimin somoirango internet gitasa DC-rang baksa tom•e chanchirimanirangko dakahaoba COVID sajinmani ja•man ian skanggipa changna apsan asonge chanchirimani ong•enga ine parakataha.
Deputy commissioner-rangan a•dokni manderang baksa aro onbatgipa gadangni manderang baksa manderangni janggi tanganio dingtanganiko ra•bana gita mikkanggrik kam ka•giparang ong•ani gimin ia tom•aniara namen mongsonggipa tom•ani ong•enga ineba Chief Minister aganaha.
Ia tom•aniara an•tangtangni ma•sianirangko sakgipin baksa sualgrikna aro saksa sakgipinoniko skie ra•grikna ong•atenggipa tom•anian ong•a ineba Sangma aganaha.
Ia tom•anio a•dok aro ma•mong sorkarini ra•gatgipa dingtang dingtang scheme-rangko a•jatangtango jake ra•e ka•enggipani bidingo deputy commissioner-rang aro SDO-rang, agan-talate on•angtokaha.
Batanggimin somoirango mikkarang jimbee waanganichi a•dokni dingtang dingtang biaprango, chirang banne aro a•arang ruronge manderang neng•nikanirangko chagrongna nangtokahani giminba ia tom•anio a•dokni Chief Minister, dingtang dingtang DC aro SDO-rang baksa chanchirimangaha.
SP aro commandant-rangni tom•aniko ong•atanio jinma chanchirimangskaengon, a•dokni dam 76 police station-rangna sorkari, gital garirangko on•gnok ine tik ka•angaha.
Police station-rangna computer-rangko, IT set up-rangko, crane aro ambulance-rangko on•dape a•dok gimikni police station-rangko namdapatna gitaba ia tom•anio sorkari tik ka•e donangaha.
Meghalaya a•doko aro mongsongbate East Khasi Hills a•jao traffic-rangko nambate nirokna man•na gita bol 60 gital motorcyle-rangko on•gen ineba ia tom•anio Chief Minister parakataha.
