Shillong, Nov 15: A·dokni dingtang dingtang skulrango skie on·enggiparang, Khasi Jaiñtia Deficit School Teachers Association (KJDSTA) aro Garo Hills Deficit School Teachers and Employees Association (GHDSTEA)ni ning·o, uamangna chu·sokate on·kugijagipa dingtang dingtang mamlarang aro neng·nikanirang baksa a·dokni Chief Secretary Ma RV Suchiang aro education department-ni Principal Secretary Pa DP Wahlang aro official-rangko gronge Sombar salo agan-golpogrikangaha.
Sorkarini official-rang baksa agangrikani ja·man KJDSTA-ni padot Babu Kular Khongjirem-ni kobor ra·timgiparangna agan-talatangani gita, “KJDSTA aro GHDSTEA ia dolgnini deficit-o skie on·enggiparang, kamoni neng·taka ja·man dingtang dingtang man·gnirangko baridapatani gimin sorkarini officialrang baksa agan-golpogrikaha, gnigipao, 5th pay Commission-o agan-ku·pattigimin gita sia-bon·ani ja·man aro kamoni neng·takani ja·man gipin man·gnigipa tangka ba gratuity-ko gong lak 3.5 oniko gong lak 10 -ona baridapatani gimin, baridapatgimin pay scale-o bangki dongenggipa arrear-rangko on·ani gimin, sana-banani korosna on·gipa medical reimbursement aro commission-ni agan-ku·pattigiminko ra·gatani giminba chinga agangrikjolaha ine parakataha.
Ia chingni dabienggiparangara mongsong nangchongmotgipa ong·ani gimino sorkarioniba chingna dintangmancha ka·dongataniko on·aha ineba Khongjirem agandapataha.
Janapjolna gita, deficit school-o skie on·enggiparangni dingtang dingtang dabianiangko sorkarini knachakjani gimin batanggimin March jao skigiparangni jinma ku·cholsan chutti ra·gope katgrimtokani a·sel bang·a skulrangon skigiparangni dongtokgijaniko nikangna gita man·ahachim.
