Shillong, May 21: Delhi-oniko aeroplane-o ra•baenggipa Guwahati airport-ona sokbaaha aro da•o iako Shillong-ni RP Chest Hospital-ona ra•baengaha ine Sukrobar salo, Health Services-ni Director Dr Aman Warr parakataha.
Dr Warr-ni parakatani gitade, Shillong Civil Hospital-na minute-prako litre 600 oxygen chipna man•e kulina sienggipa oxygen plant-koba May-ni 25 tariko Delhi-oniko aeroplane-o ra•bagnok.
“RP Chest Hospital-ona ra•baenggipa oxygen plant sokbahaon chinga knalonide ia plant-ko chatna man•gnok aro mikkang antiode ia ostrorangko chinga jakkalna man•gnok ine ka•dongenga,” ine Health official parakataha.
Indake ong•engon, Shillong civil hospital-osa oxygen-rangko nangbatengani gimin sorkari, minute-prako litre 45 oxygen chipna man•gipa generator-rangko donataha ine Dr Warr parakataha.
Dr Warr-ni parakatani gitade, Jengjal-o kulina sienggipa oxygen plant-naba 20 KL plant-ko ra•bana sienga aro ia plant, antignini gisepon a•dokona sokbagen.
