Tura, Feb 25: Sukrobar salo, Meghalaya a•dokni Chief Minister Conrad K Sangma, Dimapara aro Dalu-ona re•angenba, ia jolrango game ge•e cha•enggipa manderangni nangrime bikotgipa dingtang dingtang producer group-rangna cheque-rangko suale on•angaha.
Dalu-o ua dol 50 producer group-rangna gong lak 42.10-ni cheque-rangko suale on•aha aro uandaken Dalu block-mangmangon producer group-rangna tangka paisarangko suale on•ani da•o gong kror 1.62 gapengaha.
Ia cheque-rangko a•dokni Chief Minister, FOCUS program-ni ning•o game ge•e cha•enggipa manderangni man•gniko tang•doatna gita suale on•angaha.
Dalu-o ua me•chik dolrangni ong•atgipa self help group (SHG) mela-oba bakko ra•e, Community Investment Fund aro Start Up Fund-ni ning•o gong lak 36 tangkarangko dingtang dingtang SHG-rangna suale on•angjolaha.
Ia apsan salon ua South Garo Hills a•jani ning•o donggipa Dimapara songonaba re•ange dol 147 producer group-rangna FOCUS program-ni ning•on gong lak 82.10-ni cheque-rangko suale on•angjolaha.
Ia tom•anirango a•dokni Chief Minister, FOCUS program-ni gimin talate on•angengon, manderangni namgnina ra•gatgipa FOCUS program-ara salgro salaram a•dokrango dal•batsranggipa program ong•e COVID-19 giproroani ja•man, lak 4.50 nokdangrangna gimik gong kror 200 tangkarangko dakchake on•na man•enga ine parakataha.
Chief Minister-ni aganani gitade, batanggimin bilsignini gisepo COVID-19-ni a•sel pilakan aro mongsongbate game ge•e cha•giparang neng•nikanirangko chagrongna nangtokaha aro ia FOCUS program-chi a•dok sorkari, bang•a manderangnan dakchakanirangko on•na man•aha.
FOCUS program-ni ning•o on•enggipa tangka paisarangara sudgri on•enggipa tangka paisarangsa ong•ani gimin ian loan ong•ja ineba ua aganaha.
Producer Group-rangko aro SHG-rangko bikote sorkarini on•enggipa namgnirangko ra•china gitaba ua songni nokni manderangko didiangaha.
Dalu-ona re•angani somoio a•dokni Chief Minister, dingtangmancha PRIME Entrepreneurship Meghalaya Programme-ni ning•o kuligipa Krimkro PRIME Hub, Slaughter Unit aro Meat Processing Unit-koba kulie on•angjolaha.
Ja•mano ua Dalu PHC-onaba re•ange, ia health centre-o an•o dongenggipa me•chikrang baksaba agangrikangaha. Dalu PHC-o ua kan•dike aganprakangengon, World Bank-ni dakchakanichi aro a•doktangni chamgimin tangka paisarangchi a•dokni dingtang dingtang health centre-rangko namdapatna kam ka•enga ine Chief Minister talatangenba, Dalu PHC-ko namdapatna nangengani gimin PHC building-kon skanggipa rikchengna gita jotton ka•gen ine ku•rachakaniko on•angaha.
Dalu-ona re•angani somoio ua JICA-ni dakchakanichi Tura-oni Dalu-ona tarienggipa ramakoba NHIDCL-ni official-rang baksa niangjolaha.
