Jowai, July 8 : Meghalaya State Skill Development Society-ni ning•o a•dokni chadamberangna dingtang dingtang jakni kamrangko Bosco Pnar Multi Purpose Vocational Training Centre, Jowai-o skie on•anirangko da•aloni a•bachengataha. Jeon Electrical Domestic Solution aro Plumber General iandakgiparangko man•chapa.

Skie on•ani kamrangko a•bachengatani salo JHADC-ni MDC Brightstar Chyrmang, mongsonggipa sokgipa ong•e bakko ra•anio, “Iandakgipa skie ra•ani cholrangko sorkarini gita a•jani chadamberangna ra•baani nambegipa kam mingsa ong•a jechin skia pora gnange kamgri dongenggipa chadamberangna an•tangtangna janggi tangani cholko ra•baani ong•anggen” ine aganangaha.

Training Centre-ko nirokenggipa Fr. Francisco Dhar, Skill Development Officer Lambor Suchen aro Meghalaya State Skill Development Society-ni manderangba oprakani salo bak ra•paaha.