Shillong, June 21: Shillong Municipal Board, MeECL ni nangchongmotgipa lekka-pancharangko mesoke on•china dabigipani bidingo jagnina kingking ja•donggaate rakkiengani gimin iako chief education commissioner-ona sedognok ine RTI ka•rakgipa Dispersing Rani aganaha. Iani bidingo mija April jani 1 tarikon RTI ka•doe jegalaniko on•manahachim indiba uamangoni maming aganchakanikon man•kunaenga ine Rani kobor ra•timgiparangna aganaha.
“Mija June jani 7 tarikoba uamangko anga mol•molbeaha, indiba uamang mamingkon aganchakjaha. Uamang indaken namrenge dongaia ongode ian RTI ni niam gita chief education commissionerona re•angna nangani ong•engjok” ineba ua aganaha.
Harijan colony-o donggipa pilakan an•tangtangni a•aon dongtokenga. Ua a•arangko 1853 bilsion Syiem ua a•ako uamangna on•manaha. Unigimin MeECL nokantina bijoliko sringe on•engon niamko ja•rike dakchongmotna nanga ineba ua aganaha.
Meghalaya a•dokni dakrongbaenga gitan, pilak songdongenggiparang a•a patta dongna nanga. Uamangna 1853 bilsion a•ako Syiem on•manahaode uamangoba pattade dongtelna nanga aro sakantian ua pattarangko on•chape bijoli ra•na dorgastoko on•a nanga ineba Rani talataha.
1954 bilsio Mylliemni Syiem Joy Manik aro SMB ni dakchakgipa padot L. Palni soi ka•gimin gita Harijan colony a•ani nokgipa ong•jagenchimode uarang Syiemni aro Shillong Municipal Boardni ning•o ong•skaa ineba rani u•iataha.
Iarangni bidingo Rani ia bilsini April jani 1 tarikon jegalani chittiko on•e u•iatahaoba departmentni gita maming aganchakanikon man•kujaenga.
