Shillong, March 2: Garo Hills Autonomous District Council (GHADC)-ni AD Rules-ko walsanode dingtangatna man·jawa ine Meghalaya a·dokni Deputy Chief Minister Prestone Tynsong parakataha.

Re·baenggipa April jani 9 tariko ong·atna sienggipa GHADC election-o Tribal ong·gijagipa manderangko bak ra·na on·jachina dingtang dingtang dolrang dabitokengani gimin a·dokni Deputy Chief Minister, ia kattarangko parakataha.

“GHADC-o AD Rules-rangko tarichengaonin Tribal ong·gijagipa manderangkoba election-o bak ra·pana on·aha aro da·oba ia apsan niamkon ja·rikkuengani gimin walsanode ia niamrangko dingtangatna man·jawa. Chinga NGO-rangni nangnikanirangko ma·sichakenga indiba ian dongimin niamsa ong·ani gimin a·dok sorkari skatang dakna bil dongja,” ine Tynsong, kobor ra·timgiparangna parakataha.

KHADC aro JHADC-ni AD Rule-rangde GHADC-oni dingtanggrika ine talatangengon, “District Council-ko 1953 bilsio songchengaha aro uamang Sixth Schedule-ni dongimin niamrango pangchake AD Rule-rangko taridaproroaha. Uni gimin KHADC aro JHADC-ni AD Rule-rangkode taridapaha,” ine Deputy Chief Minister parakataha.

GHADC-ni bidingo sing·on, maini a·sel GHADC-ni AD Rule-rangko taridapjaha ua name ma·sijaha ine Tynsong parakataha.