Shillong, Jan 28: Garo Hills Autonomous District Council (GHADC)-o National People’s Party (NPP)-chi dilenggipa Executive Committee (EC)-ni ning•o adita meligrikgijanirangko nikna man•engon, a•bachengonin uni sorkari, district council-ni kamrangoni chel•e dongahani gimin ia changoba uni sorkari maming jak on•ani dongjawa ine Sukrobar salo, Meghalaya a•dokni Chief Minister Conrad K Sangma parakataha.
GHADC-ni CEM Benedic R Marak-ni dilanio kusi ong•jae adita sak MDC-rang, EC-oni ong•katahani gimin NPP-chi dilenggipa EC-ni bilko dake nina gita Sonibar salo dingtangmancha session-ko ong•atengachim ine nikna man•a.
Indake ong•engon, a•bachengonin uni sorkari, district council-ni kamrango jak on•na jechakahani gimin da•oba uni sorkari maming jak on•paani dongjawa ine Conrad talataniko on•angenba, GHADC-o ong•enggipa obostarang niam gita ong•angaichina ine parakataha.
Saksku Executive Membor (EM)-rangni kam watani bidingo ua chairman aro dingtang dingtang membor-rangonikoba u•iataniko man•soaha aro special session-ko ong•atani baksana CEM-ni kosako no-confidence motion-ko ong•atani bidingoba ua koborko man•soaha ineba Chief Minister parakataha.
GHADC-ni CEM Benedic R Marak, Opposition Trinamool Congress baksa bakrimangenga ine matnangenba, uko kamoniko ra•galchina dabie saksku MDC-rang, ia antini a•bachengaonin EC-oni ong•katgrimahachim ine nikna man•a.
EC-o bakrimenggipa bang•bata MDC-rangan uni kosako chakatahaoba GHADC-ni CEM Marak, kamtangko watna jechakskaengachim. Kamtangtangko watanggipa chairman-rangni biapoba ua Trinamool Congress-ni MDC sakgittamna biapko on•skaahachim.
GHADC-o iandakgipa obostarang ong•angani ja•man, Executive Committee-ni bilko dake nina gita Sonibar salo special session-ko ong•atchina Meghalaya a•dokni Governor Satya Pal Malik, ge•etaniko on•angaha.
