Shillong, Feb 26: A·doko district council-rangko jenan miksonge a·bachengatahachim ua kamrangko aro sason ka·china on·gimin bilrangko chu·sokatna gita man·aha ine aganenba, district council-rang, a·bri-a·kong jolni manderang chong·mot ong·anikoba chelchakna man·aha ine autonomous council aro songko-nokko dilenggiparangna India sorkarini Lok Sabha Secretariat aro District Council Affairs Department-chi Sukrobar salo Shillong songjinmao ong·atgipa outreach programme-o bak ra·e a·dokni skotong minister Pa Conrad K Sangma agan-parakataha.

Council-rango mongsong neng·nikbatgipade tangka-paisa chu·onggijanian ong·a ine aganengon, Article 280-ko janapenba, Panchayati Raj aro Municipal dolrangnade tangka-paisarangko chame donanirang gnang, indiba district council-rangnade tangka-paisa chamaniko uno man·chapatjaha ine agane, Finance Commission aro India sorkarioniko tangka-paisachi dakchakanirangko council-rangba man·na nangachim ine Pa Sangma agan-janapjolaha.

Anti-Defection Law ba Tenth Schedule-ni niamrang donggijanichi bilgrianiko man·enga ine agan-janapanio, District council-rango Tenth Schedule ba Anti Defection Law donggijanio politicalni gita pangkamna man·jaenga ine skotong minister agankuaha.
Una agreba, Meghalaya Assembly-o jinma gisiksan ong·e ra·chakanggimin, Khasi aro Garo ku·sikko 8-gipa Scheduel-o chapatani giminba ua agan-ku·pattiangaha.

A·songni syllabus-o salgro-salaramni gimin man·chapatna nangchongmotenganikoba janapjole aganengon, a·songni chu·gimikgipa bako salgro-salaramni gimin seanirangko man·chapataniara namen namgipa ong·gen ine aganenba, a·songni bak ong·paaniko tang·doatna gita salgro-salaram jolna Presidential Retreat-ko Shillong songjinmao songna nangengani giminba skotong minister Pa Conrad K Sangma didianiko on·angjolaha.