Shillong, April 20: Meghalaya a•dokni district council-rangode 10th Schedule maming nangchakeani dongja aro district council-rango anti-defection law ba dolsaoni dolsaona katjojoaniko champengna niamrang dongjani gimin seokako man•gipa MDC-rang, council-ni executive committee-ko rikanio je dol baksaba bakrimna bil dongaia ine Mongolbar salo Meghalaya a•dokni Deputy Chief Minister Prestone Tynsong parakataha.

Gital seokako man•gipa BJP-ni MDC Promod Koch, NPP-chi dilenggipa gital Executive Committee-o bakrimpaenggipani bidingo sing•anina Tynsong, ia kattarangko aganaha.
GHADC-o gital executive committee-ko rikmanahaon, NPP-chi dilenggipa Garo Hills Democratic Coalition (GHDC)-ni common minimum program-ko chu•gimik a•bachengatgnok ineba Deputy Chief Minister parakataha.