Shillong, June 29: Shillongni Jaiaw-o donggipa Dr. H Gordon Robert Hospital jean bilsi 100 gitchamgipa hospital ong•achim, uamangni gital nokko rikna Dr. DD Lapangni nokdangoni dakchakanichi da•o gitalgipa nokchurako man•aha.
“Robert Hospital namen nambegipa aro manderangni jakkaltobegipa ong•a. Ia hospital darangkon mikkang nigija ka•sae sana-bananiko on•enga. Corona sajinmani somaio iani nurserang, doctor rang an•tangtangko on•kange kam ka•aha. Bilsi 100 mangna ia hospital manderangko ka•sae sanenga” ine dakchakgipa skotong minister Prestone Tynsong hospitalni nurse aro doctor rangko mittele aganangaha. ” Ia hospital darangkon mikkang nigija ka•sae sanenggipa hospital ong•a. Pilak jat, torom basegija simsakgipa ong•a” ine Meghalaya Chief adviser Dr. DD Lapang tom•ao aganpaaha.
Ia tom•anio Dr. DD Lapangni jikgipa Ametyst Lynda Blah, Hospitalni Governing bodyni chairman Rev.SS Majaw, Roberts Hospitalni MS Dr.R Nongrum aro gipinrangba dongpaaha.
