Shillong,August 8: Meghalaya a·dokni skotong Minister Conrad K Sangma, Education Minister Pa Lakhmen Rymbui-ni dongpaanio Dr H Gordon Roberts Hospitalo donggipa Nursing College-ko August 8 tarik-o oprake on·angaha.
Conrad Sangma do·ga oprake on·ani somoio, Dr Godon Roberts Hospitalni indita bilsirangna bang·a neng·nikanirangko chagrongbaengoba indaka gadangona sokbaanina aro mande jatna sanna bannani a·jao dangdike on·enganina mitele aganan baksa, Nursing College-ko a·bachengatani salo uno poraienggipa sakgni chatri-rangsan ong·genchimoba A·doko man·ani bilsi 50 gapaniko gisik ra·ani bak gita ong·enga ine aganaha.
Dr H Gordon Roberts Hospital-ko jekon Presbyterian Mondoli-chi chalaiengchim, uan chu·sokgipa ong·china aro mikkangchi bang·a manderangni janggiko naljokatna dakchakgipa ong·chinaba skotong minister nama skaniko on·e aganaha.
Dr H Gordon Roberts Hospital-ni Nursing college-o poraiangna chol ra·genchimode ian chadamberangna a·songni a·palo, jedake Japan aro Thailand a·songrango kam ka·na cholrangko do·ga oe on·ani ong·enga maina mikkang salrango manderang jelroroanio sanna banna-niko on·agnigipa manderangko gipin a·song bang·en nangengani gimin ia cholko ra·e Nursing college-o skie ra·anggenchimode chadamberangna namgipa cholba ong·gen ineba Pa Sangma agandapaha.
