Tura, Nov. 26 : Kobor-rangko man·soani gita drae tilekana rim·gipa mande jekon Tura District Patok-o bichalni ning·o ong·kuengachim ua bristibal pringo hospitalona rimbaengmiting ramao garioni bilondrae kataha.

Drae tilekana rim·gipa mandeko Johnstar R Sangma minga uni bilsi 21 gapaha aro uan South Garo Hills District-ni Siju jolni mande ong·achim
” Chinga patoko bichalna donkuenggipa namen sabeenga ine koborko man·e sanna bannaniko taraken ra·china silchidare gnanggipa police gnangan Gypsy-o uko ra·baengachim hospitalona sokna gitikmangmangosa ia a·sel ong·aha” ine West Garo Hills-ni Superintendent of Police Pa MGR Kumar ui·ataha.

Koidi jako sildeng patako rim·ako saltete katna man·e gari hospital sokna gitiko Araimile ramao joke kataha ineba agandapaha.

Uni jako sildeng pata gnangan ua garioni bilonaha aro sorok ka·mao nok donggipa gita katangaha ineba ui·ataha
Indake ong·engon Turani pilak napram aro ong·katram biaprangon dontongija am·sandianiko dakenga aro district police drae tilekanio dosi donggipa mandeko sandina police dolrangko seoke wataha ineba kobor-na ui·ataha.

Rim·anggipa police dolni gisepo maiba daksrukanirang dongama dongja ukoba am·sandianiko dakatengaha ine kobor-o man·soaha.