Tura, Apr 28: Bristibar salo, Tura-ni MP Agatha K Sangma, West Garo Hills a•jani Rongram C&RD Block-ni ning•o donggipa Duragre songo Fisheries department-ni Training Hall-ko nokdonggae on•angaha aro ia training hall-ko nokdonggae on•angani somoio ua West Garo Hills a•jao na•tok jile cha•enggipa manderangoni seokgimin manderangna, Pradhan Mantri Matsya Sampada Yojna (PMMSY) 2020-21-ni ning•o dingtangmancha chakka samgittam donggipa garirangkoba suale on•angjolaha.
Ia training hall-ko nokdonggae on•angani somoio West Garo Hills a•jani Deputy Commissioner Ram Singh, Fisheries department-ni officer aro gipin dilgiparangba dongpae bak ra•angaha.
Duragre songni Digri Chiring Fish Seed Farm-o ia Training Hall-ko nokdonggae on•anganio Tura-ni MP, jinmana aganprakengon, ia training hall-ko kulie on•anichi ia jolrango na•tok jile cha•enggipa bang•a manderangan namgnirangko man•gnok ine parakangenba, an•tangtangni na•tok jilaniko bariate janggi tangani gadangko tang•doatchina na•tok jile cha•enggipa manderangko didiangaha.
Agatha-ni aganani gitade, ia PMMSY-ara India sorkarini ra•gatgipa scheme-rangoni mingsa namen mongsonggipa scheme ong•a aro Meghalaya a•dokoba Chief Minister-ni dilanichi a•dok sorkari, ia scheme-ko chu•sokgipa ong•atna rakbee kamrangko ka•enga.
Gipin biaprangoniko na•tok ra•baaniko komiatna nangengani gimin aganangengon, a•doko na•tok man•aniko bariatna gita rakbate kamrangko ka•china Tura-ni MP, ice box-rang baksa chakka samgittam donggipa garirangko man•gipa manderangko didiangaha.
