Shillong, Sep 22: Ia bilsio Durga Puja-ko October 2 tarikoni October 5 tarikona manianggen ine Shillong-o donggipa Central Puja Committee (CPC), Bristibar salo parakataha.
Meghalaya a•dok gimiko dam 257 Community Durga Puja aro dam 5 private Durga Puja donggen ineba CPC parakataha.
CPC-ni general secretary JL Das-ni parakatani gitade, Durga Puja-ko manigiparang Khasi Hills a•jao dam 126, Jaintia Hills-o dam 11 aro Garo Hills-o dam 120 gittimrang donggen.
Meghalaya a•dokko man•chape India a•song gimikon da•o COVID-19 sajinmako champengna gita niamrangko olgrokatahani gimin Durga Pujako kusi ong•e manina gita pilak Durga Puja committee-rangan tarisamsotokengaha ine CPC-ni president Naba Bhattacharjee parakatskaaha.
Indake ong•engon, Meghalaya a•doko Durga Pujako maniani bilsi 70 gapaniko manina gita ia September jani gisepon pilak toromrangni tom•bimonganiko CPC-ni gita Kench’s Trace Puja Pandal-o ong•atenga ine CPC-ni general secretary JL Das parakataha.
Ia tom•bimonganio Meghalaya a•dokni Chief Minister Conrad K Sangma, mongsonggipa sokgipa ong•e bakko ra•anggen aro tom•bimonganio SAFF-ni dilgiparang aro dingtang dingtang toromni dilgiparangba bakko ra•anggen ineba Das parakataha.
Durga Pujako maniani somoirango ramarang apchangket ong•jana gita man•a dipet an•tangtangni garirangko ra•gija bus-rangko re•china CPC, manderangko didiataha.
