Shillong, May 15: Tol•gipa gari lekkarangko tarie on•anio jak dongani gimin East Garo Hills a•jani district transport officer (DTO)-ko Assam police-rangni rim•gipani bidingo talbate ma•sie ra•na gita Meghalaya a•dokni Transport Minister Sniawbhalang Dhar, Sombar salo report-ko bi•ataha.
Iani bidingo kobor ra•timgipa manderangna talataniko on•angengon, report-ko nichengani ja•mansa nanga gita ja•kurangko de•na man•gen ine Dhar parakataha.
Rim•a man•gipa DTO-ko kam dontongatgenma ine sing•anina aganchakaniko on•angengon, da•o dipet ua iani bidingo mamingkoba aganna man•kujawa aro report-ko name nichengani ja•mansa nanga gita ja•kurangko de•na man•gen ine Transport Minister parakataha.
East Garo Hills a•jani DTO Genekelly G Momin-ko Assam-ni police-rang, tol•gipa gari lekkarangko tarie on•anio jak dongani gimin Robibar salo rim•ahachim ine nikna man•a.
Ia transport officer-ko Agia police station-ni circle inspector Siraj Ingti aro officer-in-charge Manimoy Tamuly rim•eahachim.
Watch now:
