Tura, March 30: Meghalaya a•dokni job reservation policy-ko rakkina gita Meghalaya High Court-ni rai on•gipa Roster System-na East Garo Hills a•jani dingtang dingtang dolrangba chakpaaniko parakataha.
East Garo Hills a•jani Williamnagar-o donggipa GSU, FAF, AIGU, AAYF, WGCSU, Sumo Pik Up & Auto Association-rangba Reservation Policy-ni Roster system-na chakpaaniko parakataha.
Ia NGO-rangni parakatani gitade, Meghalaya a•dokko man•chengaonin Reservation Policy-ko tariahaoba bang•a changon kamrangko tikate on•ani tik ong•jaengachim aro uandaken bang•bata somoirangon Garorangde man•na nangani kri kamrangko man•tokjaengachim.
Indake ong•engon, a•dokni Reservation Policy-ko rakkina aro niamko ja•rikna gitasa Meghalaya High Court, dingtangmancha Roster system-ko ra•gatchina a•dok sorkarina ge•etaniko on•aha aro ian a•doko songdongenggipa pilak jatrangnan namgni ong•gen ine Williamnagar-ni NGO-rang parakataha.
Roster system-ko jegale Voice of the People’s Party (VPP) MLA Ardent Miller Basaiawmoit-ni jingjengatna ka•mikkenatgipani bidingo janapatengon, jingjengatanichi iako namatna man•gen ine ua chanchienga ong•ode uamangba apsan daken jingjengatna man•aigen ine East Garo Hills a•jani NGO-rang parakataha.
Mikkangchi a•doko songdongenggipa dingtang dingtang jatrangni gisepo maming ma•sisretgrikani aro meligrikgijanirang ong•katjana gita High Court-ni rai on•aniko mande ra•china gitaba East Garo Hills a•jani NGO-rang didiataha.
