Williamnagar, Sep 5: East Garo Hills-ni skigipa saksa Gamchi Timre R Marak-na, mikkim gnangbegipa National Teachers Award 2022-ko on•aha aro ian Meghalaya a•dokna aro mongsongbate A•chik a•songni manderangna mikkim rasongko ra•baani gita ong•aha.

National Award-ko man•gipa Gamchi Timre R Marak, East Garo Hills a•jani Williamnagar-o donggipa Educere Higher Secondary School-ni skotong skigipa ong•a aro uaba salgro salaram a•dokrangoni ia national award-na seokako man•gipa saksni skigiparangoni saksa ong•paaha.

Ia National Teachers Award 2022-ko New Delhi songjinmani Vigyan Bhawan-o Skigiparangni Salko maniani somoio, a•songni President Droupadi Murmu-ni jakchi skigiparangna on•angaha.

A•songni nambatsranggipa skigiparangna ia national award-ko Education Ministry-ni gita pangna bilsian Teachers Day ba Skigiparangni Salo on•rongengachim.