Tura, Oct 28: East Garo Hills a•jani District Sericulture Office, Meghalaya Basin Development Authority (MBDA) baksa nangrime, East Garo Hills a•jao donggipa dingtang dingtang songni me•chikrangna ba•ra dokani, kilding tariani, kilding rong dim•ani aro uandakgipa jakni kamrangko skie on•na gita Bristibar sal dipet dingtangmancha training program-ko Mangsang jolo donggipa Nongbak Rengkil songo ong•atenga.

Ia training program-ko East Garo Hills a•jani EAC YW Momin, a•bachengate on•angaha aro ia program-ko a•bachengate on•angani somoio East Garo Hills a•jani Deputy Commissioner Swapnil Tembe-ba dongpae bak ra•angaha.

Ia training program-ko ong•atanio sak 40 me•chikrangna ba•ra dokaniko jasana aro kildingrangko tariani baksana kildingrangko rong dim•aniko sal 5 ka•e skie on•anggen ine u•iataha.

Songo noko maming janggi tangani cholgri ong•gipa me•chik aro chadamberangna nambata janggi tangani gadangko on•na man•na gita ia program-ko ong•atenga ineba u•iataha.