Williamnagar, Jan 10: 2025 bilsini gisepon Tuberculosis (TB) sabisiko bon•atsrangna miksonganirang dongengani gimin East Garo Hills a•jao TB sagipa manderangna an•seng baljokaniko on•na gita Mongolbar salo East Garo Hills a•jani District TB office-ni gita TB sagiparangna namgipa cha•anirangko suale on•angaha.
TB sagiparangna cha•anirangko suale on•na gita program-ko ong•atanio East Garo Hills a•jani Senior Medical & Health Officer Dr SR Marak, jinmana aganprakangengon, TB sabisiara batninggipa sabisi ong•a aro je manderangan an•chi gri ba an•chi gnang gusuenga, be•enni gita jreani komienga, be•en an•jrime saenga ba walni somoio ding•ol ong•kate saenga, uandakgipa manderangde sepangbatgipa sorkari hospital-rangona re•bae indin sanna bananiko ra•na man•gen ine parakataha.
Ia tom•anio Williamnagar Civil Hospital-ni Medical Superintendent Dr CEN Sangma-ba jinmana aganprakengon, TB sabisiko sannani bidingo talate on•angenba, ia sabisiko jadokni gisepon sanna man•a ine parakataha. Doctor-rangni ku•pattiani gita samrangko somoi gita aro matchote ringchinaba ua TB sagipa manderangko didiangaha.
Ia tom•anio, Williamnagar-ni MLA Marcuise N Marak, mongsonggipa sokgipa ong•e jinmana aganprakangskaengon, TB saenggipa manderangni namgnina ia program-ko ong•atahani gimin District TB office-ko mittelpilangenba, TB sagiparangko sannanio ua an•tangba pilak nanga dakchakanirangko ia office-na on•anggen ine ku•rachakaniko on•angaha.
