Jowai, Jan 30: Jolo songdongenggipa manderangni badi ka·anirangko man·ahani gimin East Jaintia Hills a·jani Mynkre-o donggipa ro·ong quarry-ko Jaintia Students Union (JSU) chipe donataha.
Koborko on·ani gitade, Sonibar salo JSU-ni membor-rang, NHAI-chi dilenggipa GR Infra Project-ni chalaienggipa ro·ong quarry-ona re·ange nieon, ia ro·ong quarry-oni nangana bate wal·kurang ong·katengani a·sel mandena namgijaniko ong·atenga ine nikenba, ia ro·ong quarry-ko chipe donataha.
Ia ro·ong quarry-o wal·ku jokaniko champengna cholrangko tarikujaskal, ia quarry-ko chipe donangkugen ine JSU-ni president Livingson Sama parakataha.
