Shillong, June 23: Shillong-Dawki highway ramako apalatani kamna Upper Shillong, 7th Mile-ni ramasamoni Shillongket bolrangko den·peani gimin songdonggiparangni gisepo social media-o namen jikjakanirang ong·enga.
Paktangtangchini gari bol-bri re·sretgrikna man·e ramako apale tariatna gita Eastern Air Command-ni sambajolniko Mongolbar aro Butbar salrango bolrangko den·peani gimin songdonggiparang una suk ong·gijaniko parakangtokaha.
A·dokni skotong minister Pa Conrad Sangma-ba iani gimin an·tangni suk ong·gijaniko janapatpaenba, bolrangko da·o den·peenganiko gisiko namen dongtogijani ong·a ine an·tangni social media jakkalgipao seatengon, namroro-silroroani aro samtangtangko nama tiktako donna nangenga ine skotong minister Butbar salo parakataha.
Iana bate nambatgipa cholko man·kujana kingking bolrangko skatang den·peaniko dontongatchina gitaba ua, National Highway Infrastructure Development Corporation Limited (NHIDCL)-ko didiataha.
Social media jakkalgipa bang·an da·o bolrangko den·peaniko nike an·tangtangni suk ong·gijaniko parakattokaha jeoni mitamrang, ua kamrangko dontongchina aro uana minggipin cholko sandichina gita didiattokaha.
Mitamrang, ramako apalatna bolrangko den·pee galaniko ra·chaktokaha indiba damgipin biapo bolrangko bang·bate ge·skaaniko nangniktokskaaha.
Uandakgipa manderangan da·o sajinmani bon·roroangachi janggi tangbewalona sokbapilon Shillong-oni salsanti re·ruragipa hajal manderangni janggi tanganirangko tang·doatna dakchakani ong·gipa namroro-silroroani kamrango bang·a-bang·gijakode gimaatna nangtelaigen ine an·tangtangni chanchianirangko parakangtokaha.
Sajinmani a·sel lockdown-ko ra·gatna skang, ramarango gari-gorani sket-changket dakanichi basakoba kontasa batpile jachange dongna nanganiko chagrongbarongon, ramako apalatchina aro ge·gipin ramako tarie on·china gita manderang dabitoka, indiba jensomoio kamrangko a·bachengaton samtangtangko nosto ka·ani giminba manderang jegipa dongkuaia ine mitam manderang social media-o jera-ra·grikangtokaha.
