Shillong, Dec 15: Elaka Sutnga-ni ning·o donggipa songrango songdongenggipa manderang, Environment Coordination Committee (ECC)-ni bimango, Bristibar salo, Chikilo-oni East Jaintia Hills, Khliehriat-ni Deputy Commissioner Office-ona tom·tome re·jomaniko ong·atangaha.
Ia re·jomaniko ong·atanganiara, Elaka Sutnga-ni ning·o donggipa ge 14 Coke karkanarangko chalaienganichi a·jani balwarangko, a·a aro chirangko rongtalgija ong·atengani gimin ua karkanarangko chipatchina dabiani ong·achim.
Chikilo-oni re·jombae DC office-ona sokeani ja·man, manderang dikdiksana ua biapo tom·dakangangtokaha jeon, Elaka-ni dilgiparang aro Waheh Chnong-rang an·tangtangni gamgipa-ge·gipa mi-misirangko, chibimarangko aro balwarangko rongtalgija ong·ate namen nisiatenga ineming bakbakan ua joloni karkanarangko chipatchina gita dabiangtokaha.
Joloni ge 14 Coke karkanarangko chipatchina dabie ECC, a·jani DC, Pa A Bharanwal-na memorandum-koba ong·angjolaha.
Iani bidingo DC Pa Bharanwal, ia mamlara kacharini jako ong·engani gimin, High Court-ni hukumko sengchina gita re·jomanio bakko ra·gipa songni manderangko mol·molangaha.
