Shillong, May 5: Meghalaya a•doko aro mongsongbate East Khasi Hills a•jao COVID-19-ko man•giparang ta•raken batrorobaengahani gimin a•dok sorkari, Budbar salo tom•e chanchirimangenba, East Khasi Hills a•jao Budbar attam 8:00 bajioni a•bachenge re•baenggipa May 10 tarik attamni 5:00 bajiona chu•gimik lockdown-ko ra•gatataha.

Meghalaya a•dokni Chief Minister Conrad K Sangma-ni u•iatani gitade, Shillong-ni hospital-rango sabisi man•e dongenggiparang da•o 60 percent gapengahani gimin a•dok sorkari, East Khasi Hills a•jao chu•gimik lockdown-ko ra•gatangaha aro gipin a•jarangoba antini bon•ao lockdown-ko ra•gatskana manchiangaha.

“Meghalaya a•doko COVID-19-ko man•e dongenggiparang da•o sak 2000 batengaha aro ian namen jajrengna nangani ong•engahani gimin chinga East Khasi Hills a•jao chu•gimik lockdown-ko ra•gate gipin a•jarangoba antini bon•ao lockdown-ko ong•atskana tik ka•aha,” ine Chief Minister, dingtang dingtang department-ni officer-rang aro gipin cabinet minister-rang baksa tom•e chanchirimani ja•man, kobor ra•timgiparangna parakataha.

Cabinet minister-rangko dingtang dingtang a•jarangona re•ange obostarangko nipilechina aro Sukrobar salo Shillong-ona re•angpile report-ko on•china gita ge•etaniko on•ataha ineba Chief Minister parakataha.

“Sonibar salo a•dok sorkari, obostarangko nipilanggen aro nangani kri ja•kurangko de•angkugen,” ine Sangma aganaha.

Conrad Sangma an•tangba Bristibar pringo Tura-ona re•bae West Garo Hills a•jao ong•enggipa obostarangko nipilanggen ine u•iataha.

May-ni 6 aro 7 tarikrango ong•atna tik ka•gimin board porikkarangko re•baenggipa May 11 aro 12 tarikrangona ra•doatskaaha ineba Chief Minister parakataha. “Iani bidingo education department, u•iataniko on•anggen,” ine Sangma aganaha.

Chief Minister-ni aganani gitade, niamrangko ra•gatanichi bazar antirango manderangni jinma tom•chimonganirangko adita komiatna man•aha indiba sabisiko man•giparang salantian batrorobaengani gimin sorkari rakbata niamrangko ra•gatskana nangaha.

Meghalaya a•dok gimikon gari gorarangni re•ruraanirangko bilakbate champengatgnok aro a•dok damsaoni damgipinona re•ruraanirangko, mongsongbate East Khasi Hills-ona manderangni re•ruraaniko rakbate champengatgnok ineba Chief Minister parakataha.

“East Khasi Hills a•jani pilak mongsonggipa bazar antirangko chipgnok. Manderangni nangchongmotgipa bosturangko gittimtangtangni dokkanrangoniko man•gen aro bosturangko nokrangona ra•ange on•naba man•gen,” ine Sangma aganaha.

East Khasi Hills a•jao me•su samjak aro uandakgipa bosturangko salrurana gita East Khasi Hills a•jani DC, niamrangko tarie on•gen.

Bia ka•ani aro mande sianirango deputy commissioner-oniko permission ra•chenge sak 20-na bate tom•na man•jawaha.

Lockdown-ni somoio an•seng baljokani kamrangko ka•giparangde re•rurana man•aigen aro COVID-ni tikarangkoba su•angkuaigen. Lockdown-ni somoio a•dokona nangchongmotgipa bosturangko salbaenggipa garirangkoba re•na on•aigen.

Indake ong•engon, lockdown-ni somoio noktangtango nape dongchina, tika su•e ra•na chol man•enggiparangko su•e ra•china aro sorkari baksa bakrimaniko on•china gitaba a•dokni Chief Minister, a•doko songdongenggipa manderangko mol•molataha.