Shillong, Oct 20: East Khasi Hills a·jani District Tuberculosis Officer-ni office, Bristibar salo, Laitumkhrah, Bishop’s House-ni Social Service Centre-o “Food Distribution Support Scheme”-ko ong·atenba Tuberculosis ba TB sagiparangna bilak-mangrakaniko on·gnigipa cha·ani bosturangko suale on·angaha.
A·doko TB saa man·gipa gimikoni sak 1300 mangni gitade East Khasi Hills a·jaoni ong·a. Uandake, gimik sak 22 TB sagiparangna be·enna mangrakaniko on·gipa cha·ani bosturang aro ration-ko suale on·angtokaha. Ia ration-rangko pangnan jaanti TB sagiparangna suale on·enga.
Dr Jennifer Kharwanlang, programo bakko ra·e agananganio, je sagiparangan salni programo dongpaachim sakgipinrangna TB sabisini kosako chegipa ong·e mesokchina aro iandakgipa programrangona re·bana gong·gijagipa manderangna nama agan-ku·pattianirangko on·skachina gita mol·molangaha.
TB-na samrangko jadoksan jakkalna gita nangaia indiba ringaniko watchangode gital dake a·bachengtaina gita nanga ine janapatengon, samrangko jakkala baksanaba be·enni bilak-mangrakanina namgipa cha·anirangko cha·na nanga ineba Dr Jennifer sakantikon didiangaha.
Unomiting, TB saoni an·sengpilgipa saksani ma·gipa Annabella Nongrum, depanteni TB saarang maidake nampilahachim aganprakangenba, dingtang dingtang dake dakchakaniko on·anina doctor-rang aroba social service centre-ko mittelpilangaha.
