Shillong, Aug 8: Da•o ong•enggipa Parliament-ni Monsoon Session-ona Electricity Amendment Bill 2022-ko ra•ange, Electricity Act-ko ma•mong sorkarini taridapna miksongenganiko Coordination Committee of Registered MeECL (Employees) Associations and Unions (CCORMAU) raken jegalataha.
Ia Electricity Amendment Bill 2022-ko a•song gimikon jegaltokengon, Meghalaya a•dokoba MeECL-o kam ka•enggipa engineer-rang aro gipin kam ka•giparang, Sombar salo kontagnina kamtangtangko dontongate, Shillong songjinmani Lumjingshai-o jingjengatanirangko dakangaha.
Iani bidingo coordination committee-ni president PK Shullet, kobor ra•timgiparangna talataniko on•angengon, ia bill-ko ru•utbea bilsirangna donchipahaoba aro da•o ong•enggipa Parliament-ni Autumn Session-o pass ka•na nanggipa bill ong•jagenchimoba, ma•mong sorkari, ia Bill-ko Monsoon Session-o pass ka•drana jotton ka•enga ine an•tangni suk ong•gijaniko parakataha.
Shullet-ni parakatani gitade, ia Electricity Amendment Bill 2022-ko pass ka•ahaode private company-rangba a•dokona re•bae MeECL baksa bijolorangko on•na man•gnok aro ian bijoli jakkalenggiparangna nangchakeaniko ra•baani gita ong•genchim.
A•doko private company-rangba bijoliko on•na a•bachengahaode, bijoliko jakkalenggipa nokdangrangoni cholikalgipa nokdangrangde private company-rangoniko ra•na a•bachenggnok aro cholgri ong•pagipa nokdangrangsan MeECL-oniko bijoli ra•e ian a•dokna noksan ong•aniko ra•baani gita ong•gnok ine Shullet parakataha.
