Tura, Nov 29: India a·song gimikon ong·atenggipa ‘Azadi Ka Amrit Mahotsav’-ni bak gita Food & Public Distribution Department-ni ning·o donggipa Food Corporation of India (FCI)-ni gita Sombar salo, awareness program-ko Tura-o ong·atangaha.
Ia program-ko ong·atanio West Garo Hills a·jani Additional Deputy Commissioner aro DRDA-ni Project Director CN Sangma, skotong sokgipa ong·e jinmana aganprakangengon, social media-rango ‘Fortified Rice’-ni gimin tol·e jangbingbanganirangko bebera·jachina didiangenba, ia taridapgipa mirongkora dal·drobaenggipa bi·sarangni namgninasa tariaha aro ia mirongko cha·anio mandena maming kenna nangani dongja ine talataniko on·angaha. Ia mirongni gimin ba maiba ma·sina nanganirang donggenchimode pangnan district administration-oniko ba Food Safety Officer-rangoniko sing·sandie ra·china gitaba Sangma didiangaha.
Ia program-o bakko ra·anggipa Mothers Union-ni president Balsa B Sangma-ba Hub News baksa agangrikengon, a·songni pilak biaprangon chu·onga gita namgipa cha·anirangko man·jaengani gimin aro me·chikrang aro bi·sarangni gisepo an·chirang chu·ongjaengani giminsa ia ‘Fortified Rice’ program-ko ma·mong sorkari a·bachengate, dal·drobaenggipa bi·sarangna nangchongmotgipa cha·aniko on·enga ine talataniko on·angaha.
Ia fortified rice ba be·enna nanganirangko on·dape tarigimin mirongko Public Distribution System (PDS), Mid-Day Meal (MDM) aro gipin cholrangchiba sorkari, manderangna suale on·engachim aro ia program 2024 bilsio matchotna siengachim.
Ia program-ko ong·atanio jinmana agan-talate on·anggipa gipin manderangara, FCI Shillong-ni Divisional Manager Bajranglal Agarwal aro gipin official-rang ong·a.
