Shillong, July 11: Federation of All Meghalaya Adhoc Secondary School Teachers Association (FAMASSTA) ru•uta bilsirangonin adhoc school-ni gadangoniko deficit school-ni gadangona ra•dochina dabie, a•dok sorkarini kosako jingjengatanirangko mikkangchiba dakangkugen ine u•iataha.
Association-ni President, B.Kharumnuid-ni parakatani gitade uamangni dabiani gita sorkari 50%-ko on•gija 45%ko on•aniko uamang ra•chakaha indioba deficit-ni gadangona ra•dona dabianirangkode mikkangchiba uamang dakangkuaigen.
A•dok ni Chief Minister Conrad Sangma-ko uamang 2018 bilsio FAMASSTA-ni gita gronge memorandum-ko on•aha. Unikoa 2019 bilsioba aro 2022 bilsini March jaoba gisik ra•piltaiatna changsatai memorandum-ko on•taiaha ineba janapataha. Gnigipa changna memorandum-ko on•taie Chief Minister-ko grongtaiani somoio, association-ni dabianirangko chu•sokatna kamrangkode a•bachengatengaha indioba sorkario tangka paisani gita neng•nikanirangko man•enga ine Chief Minister-ni uamangna parakatanikoba janapataha.
FAMASSTA-ni memorandum-ko a•dokni Education Minister Lahkmen Rimbui aro Education Department-ni Director-naba on•aha.
Kharumnuid-ni agandapani gitade uamang ru•uta bilsirangna sorkarini kosako sinjetanirangko on•anichi 45% baridapatna ku•chakaniko 2022 bilsini June 20 tariko man•aha indioba 50 % dakataona sengangkuaigen ineba janapataha.
Ru•utbea bilsirangna dabiani ja•mano da•o minister ong•enggipa Conrad K Sangma-ni, skigipa sakprako hajal sku tangkarangko bariatna parakatako man•ahaoba deficit gadangona ra•doanian FAMASSTA-ni mongsonggipa dabianide ong•a ine association-ni Vice President M. Jana agandapataha.
Indake, adhoc school-o skigipani kamko ka•enggipa sakanti skigiparangkon, dilgipani kosako ka•dongchina maina an•tangtangni namgninan kangkare ka•e kamko ka•dilenga aro deficit-ni gadangona tang•doataniko man•ja dipetna ku•monge kamrangko ka•angkuna didiaha.
