Shillong, January 17: A•dokni skul skigiparangni dol jekon uamang Federation of All School Teachers of Meghalaya ine bimingko ra•a, uamangni ru•uta salrangoni dabienggiparangko governmentni chu•sokatna man•jaengani gimin sombar salo Shillongni secretariat mikkango jingjengatangaha.
Uamang salbri somaiko ra•e jingjengatangna sienga. January 17 tarikoni 20 tarikona tom•tome jegalaniko dakangna tik ka•aha, una agreba ia salbrini gisepo sorkari maming aganchakaniko on•kujaode, re•baenggipa January 21 tarik, Meghalayani chang 50 gipa state man•aniko maniani salo chinga ba•ra gisimrangko ra•e jegalangkugen ine FASTOMni padot Kennet Shadap aganaha.
“Chinga 2018 bilsionin chingni neng•nikanirangko sorkarina u•iatna changni chang memorundumrangko on•manaha aro skotong minister baksa mija Septemberni 21 tariko bon•kame tom•e chanchigrikaha, indioba rasong gribee maming ka⋅dongani kattarang dongkujaenga. Skotong minister baksa tom•e chanchianio, chingni skulrangko deficit systemna ra•na man•jaomangba deficit pattern-ona mangmangde ra•doatpabo ine chinga mol•moalahachim” ineba Shadap aganaha.
“Chasongnikri aro somaini kri salantio nangenggipa bosturangba dam rakrorobaengjok, Adhoc schoolni teacherangni dormaharangko niatode uamangba bang•pagija man•anirangchisa cholipaenga. 2016 bilsioni da•alona kingking adhoc skulrangnaba maming bariatani dongkujaenga. Somaiko aro bostuni damrangko nigrike dormaharangko bariatna nangengjokchim” ine Shadap aganangkuaha aro Meghalayani bilsi 50 ong•aniko maniani salna skang, uamang baksa golpogrikchina ine FATSOM a•dok sorkariko didiangjolaha.
